सायंकाळची शोभा

पिवळे तांबूस ऊन कोवळे पसरे चौफेर
ओढा नेई सोने वाटे वाहूनिया दूर ||

झाडांनी किती मुकुट घातले डोकीस सोनेरी
कुरणांवर शेतात पसरला गुलाल चौफेरी ||

हिरवे हिरवे गार शेत हे सुदंर साळीचे
झोके घेती कसे चहुकडे हिरवे गालिचे ||

सोनेरी मखमली रुपेरी पंख कितीकांचे
रंग कितींवर तर्‍हेतर्‍हेचे इंद्रधनुष्याचे ||

अशी अचल फुलपाखरे फुले साळीस जणु फुलती
साळीवर झोपली जणु का पाळण्यात झुलती ||

झुळकन सुळकन इकडुन तिकडे किती दुसरी उडती
हिरे, माणके, पांचू फुटूनी पंखची गरगरती ||

पहा पाखरे चरोनी होती झाडांवर गोळा
कुठे बुडाला पलिकडे तो सोन्याचा गोळा ||

--- भा. रा. तांबे