चालता चालता काय होते

समोर समोर चालता चालता शेवटी संपून जाईल रस्ता, आकाश राहील उभे पुढ्यात, चांदोबाला लागेल हात. असे काही मनात धरून चालत सुटलो रस्त्यावरून.

गळ्यात गलोल, हातात छडी, खिशात शेंगदाण्याची पुडी. चालता चालता काय होते, रेल्वे फाटक आडवे येते. गाडीला मग 'टाटा' करतो समोर समोर चालत राहतो.

चालता चालता काय होते,                           एक छोटे तळे लागते, पाय बुडवून, भाकऱ्या खेळून दाणे खात चालतो फिरून.

पुढे एकदम आले समोर, चिंचेचे वन हिरवेगार ! गलोल मारून चिंचा पाडतो, चोखत चोखत दुडका पळतो.

मग पुढे काय झाले, ओसाड माळ, डोंगर आले. सगळीकडे सामसूम कडक ऊन घामाघूम. बसून राहिलो दगडावर एकटा एकटा... दूर घर... 'आई आई' ओरडू वाटले, दाटून दाटून रडायला आले. खाड खाड बूट वाजले उंचच उंच कोण आले ?

आरपार घाबरून गेलो,   अंथरुणात मी उठून बसलो.